Facebook YouTube
Home | Topics | Contact | Mail List | Donate | Bookstore | MT | AHLB
Topics Hebrew Bibles

Hebrew New Testament: Judah (Jude)



Index & About

אִגֶּרֶת יְהוּדָה


פרק א

יְהוּדָה עֶבֶד יֵשׁוּעַ הַמָּשִׁיחַ וַאֲחִי יַעֲקֹב אֶל־הַמְקֹרָאִים בֵּאלֹהִים הָאָב וַאֲהוּבִים נְצוּרֵי יֵשׁוּעַ הַמָּשִׁיחַ׃א
חֶסֶד שָׁלוֹם וְאַהֲבָה יִרְבְּיוּן לָכֶם׃ב
יְדִידִים כַּאֲשֶׁר חַשְׁתִּי לִכְתֹּב אֲלֵיכֶם לְפִי כָל־חֶפְצִי עַל־דְבַר יְשׁוּעַת כֻּלָּנוּ הֱצִיקַתְנִי רוּחִי לְעוֹרֵר אֶתְכֶם בְּמִכְתָּבִי לְהִלָּחֵם מִלְחֲמוֹת אֱמוּנָה אֲשֶׁר נִתְּנָה כָלִיל לַקְּדשִׁים׃ג
כִּי בָאוּ אֲנָשִׁים בְּהִתְגַּנְּבָם בְּתוֹכֵנוּ אֲשֶׁר נִקְּבוּ מֵאָז לִנְפֹּל בִּידֵי הַמִּשְׁפָּט אַנְשֵׁי רֶשַׁע הַהֹפְכִים חֶסֶד אֱלֹהֵינוּ לִדְבַר בְּלִיַּעל וּבַאֲדֹנֵינוּ משֵׁל יָחִיד יֵשׁוּעַ הַמָּשִׁיחַ יְכַחֲשׁוּ לֵאמֹר לֹא הוּא׃ד
וַאֲנִי לְהַעֲלוֹת עַל־לִבְּכֶם חָפַצְתִּי אֶת־כָּל־אֲשֶׁר יְדַעְתֶּם מֵאָז כִּי אַחֲרֵי אֲשֶׁר גָּאַל יְהוָֹה אֶת־הָעָם מֵאֶרֶץ מִצְרַיִם הֶאֱבִיד אֹתָם אֲשֶׁר לֹא הֶאֱמִינוּ׃ה
וְאֶת־הַמַּלְאָכִים אֲשֶׁר לֹא־שָׁמְרוּ אֶת־מֶמְשַׁלְתָּם וְאֶת־מְעוֹנָם עָזָבוּ הִסְגִּירָם לְגֵיא צַלְמָוֶת אֲסוּרִים בְּמוֹסֵרוֹת לְמִשְׁפַּט הַיּוֹם הַגָּדוֹל׃ו
כִּסְדֹם וַעֲמֹרָה וְהֶעָרִים מִסָּבִיב אֲשֶׁר זָנוּ בְדַרְכֵי זְנוּנֵיהֶם וְאֶל־בְּשַׂר זָרִים עָגָבוּ נִמְנוּ לְנִקְמַת אֵשׁ עוֹלָם לִהְיוֹת לְאוֹת דֵּרָאוֹן לְכָל־בָּשָׂר׃ז
וּכְמוֹ־כֵן חֹלְמֵי הַחֲלֹמוֹת הָאֵלֶּה אֲשֶׁר יְטַמְּאוּ אֶת־הַבָּשָׂר יִבְזוּ שָׂרֵי מַעְלָה וְעַל־אַדִּירִים יַבִּיעוּ עָתָק׃ח
וּמִיכָאֵל הַשַּׂר הַגָּדוֹל לַמַּלְאָכִים כַּאֲשֶׁר רָב עִם־הַשָּׂטָן בִּמְרִיבַת גְּוִיַּת משֶׁה לֹא־הִבִּיעַ עָתָק עָלָיו בַּמִּשְׁפָּט רַק אָמַר יִגְעַר יְהוָֹה בָּךְ׃ט
אַךְ אֵלֶּה יְחָרְפוּן וְלֹא יֵדְעוּן מָה וּמָה אֲשֶׁר יֵדְעוּן כְּחָק־בְּהֵמוֹת אֵין תְּבוּנָה בָם יֵהָפֵךְ עֲלֵיהֶם לְמַשְׁחִית׃י
אוֹי לָהֶם כִּי־הָלְכוּ בְדֶרֶךָ קַיִן וְעֵקֶב שָׂכָר נִדְּחוּ בְתַעְתֻּעֵי בִלְעָם וּכְמוֹ בְמֶרֶד קֹרַח יָרְדוּ לַאֲבַדּוֹן׃יא
צוּרֵי מִכְשֹׁל הֵם עַל־דַּרְכֵיכֶם ישְׁבִים אִתְּכֶם לְמִשְׁתֵּה אֲהָבִים וְרֹעִים אֶת־נַפְשָׁם וְלֹא יֵדְעוּ בשֶׁת נְשִׂיאִים נִדָּפִים בָּרוּחַ וְאֵין גֶּשֶׁם עֵצִים בְּשַׁלֶּכֶת וְאֵין פֶּרִי וּמֵתִים מָוֶת מִשְׁנֶה מֵעָנָף וְעַד־שֹׁרֶשׁ׃יב
גַּלִּים סֹעֲרִים בַּיָּם אֲשֶׁר יִגְרְשׁוּ רֶפֶשׁ בָּשְׁתָּם כּוֹכָבִים נְבֻכִים אֲשֶׁר־חשֶׁךְ אֲפֵלָה צָפוּן לָהֶם עֲדֵי־עַד׃יג
וְעַל־אֵלֶּה נִבָּא שְׁבִיעִי לְאָדָם הוּא חֲנוֹךְ לֵאמֹר הִנֵּה בָא יְהוָֹה וְרִבְבוֹת קְדשָׁיו עִמּוֹ׃יד
לַעֲשׂוֹת מִשְׁפָּט בַּכֹּל וּלְהוֹכִיחַ אֶת־בְּנֵי בְלִיַּעַל כֻּלָם עַל־כָּל־אֲשֶׁר הִרְשִׁיעוּ לַעֲשׂוֹת וְעַל־כָּל־דִּבְרֵי עָתָק אֲשֶׁר דִּבְּרוּ־בוֹ הַחַטָּאִים בְּזָדוֹן׃טו
אֵלֶּה הֵם רֹגְנִים מִתְלוֹנְנִים וְזֹנִים אַחֲרֵי תַאֲוָתָם אֲשֶׁר פִּיהֶם יְדַבֵּר גְּדֹלוֹת וְנֹשְׂאִים פָּנִים בְּעַד בֶּצַע כָּסֶף׃טז
אַךְ אַתֶּם יְדִידִים זִכְרוּ אֶת־הַדְּבָרִים אֲשֶׁר נֶאֶמְרוּ מִקֶּדֶם בְּיַד שְׁלִיחֵי אֲדֹנֵינוּ יֵשׁוּעַ הַמָּשִׁיחַ׃יז
אֵת אֲשֶׁר הִגִּידוּ לָכֶם כִּי בְאַחֲרִית הַיָּמִים יָקוּמוּ לֵצִים רֹדְפֵי תַאֲוָה לְפִי שְׁרִירוּת לִבָּם הָרָע׃יח
הֲלֹא הֵם הַמִּתְגֹּדְדִים לִגְדוּדִים בַּעֲלֵי־נֶפֶשׁ וְרוּחַ אֵין בָּהֶם׃יט
וְאַתֶּם יְדִידִם הָשִׁיבוּ נַפְשְׁכֶם בָּאֱמוּנָה אֲשֶׁר הִיא לָכֶם קֹדֶשׁ קֳדָשִׁים וְחַלּוּ פְנֵי־אֵל בְּרוּחַ הַקֹּדֶשׁ׃כ
וּשְׁמַרְתֶּם אֶת־נַפְשֹׁתֵיכֶם בְּאַהֲבַת אֱלֹהִים וּלְחַסְדֵי יֵשׁוּעַ הַמָּשִׁיחַ אֲדֹנֵינוּ חַכֵּה תְחַכּוּ לְחַיֵּי עוֹלָם׃כא
וְאֶת־אֵלֶּה הַמִּתְגֹּדְדִים יַסֹּר תְּיַסְּרוּן אֹתָם בְּחֶמְלָה׃כב
וְיֵשׁ מֵהֶם אֲשֶׁר תּוֹשִׁיעוּן וְהַצִּילוּ אֹתָם כְּאוּד מִשְּׂרֵפָה וְיֵשׁ מֵהֶם אֲשֶׁר עֲלֵיהֶם תָּחוֹסוּ בִרְעָדָה וְשַׁקֵּץ תְּשַׁקְּצוּ אֶת־הַבֶּגֶד הַמְגֹאָל מִזּוֹב הַבָּשָׂר׃כג
וְהוּא אֲשֶׁר בְּיָדוֹ לִשְׁמָרְכֶם מִמּוֹקֵשׁ וְלַהֲקִימְכֶם תְּמִימִים לִפְנֵי כְבוֹדוֹ בְּשָׂשׂוֹן רָב׃כד
אֱלֹהִים הֶחָכָם לְבַדּוֹ הַגֹּאֵל אֹתָנוּ לוֹ הַכָּבוֹד וְהַגְּדֻלָּה וְהַמֶּמְשָׁלָה וְהַגְּבוּרָה מֵעוֹלָם וְעַד־עַתָּה וְעַד־עוֹלְמֵי עוֹלָמִים אָמֵן׃כה