| ויצו . את . אשר . על . ביתו . לאמור . מלא . את . אמתחות . האנשים . אוכל . כאשר . יוכלון . סאת . וסים . כסף . איש . בפי . אמתחתו | 1 |
| ואת . גביעי . גביע . הכסף . תסים . בפי . אמתחת . הקטון . ואת . כסף . שיברו . ויעס . כידבר . יוסף . אשר . דיבר | 2 |
| הבוקר . אור . והאנשים . שולחו . המה . וחמוריהם | 3 |
| הם . יצאו . את . העיר . לוא . הירחיקו . ויוסף . אמר . לאשר . על . ביתו . קום . רדוף . אחרי . האנשים . והיסגתם . ואמרת . אלהם . למה . שילמתם . רעה . תחת . טובה | 4 |
| הלוא . זה . אשר . ישתה . אדוני . בו . והוא . נחש . ינחש . בו . הרעותם . אשר . עסיתם | 5 |
| ויסיגם . וידבר . אלהם . את . הדברים . האלה | 6 |
| ויואמרו . אליו . למה . ידבר . אדוני . כדברים . האלה . חלילה . לעבדיכה . מעסות . כדבר . הזה | 7 |
| הן . כסף . אשר . מצאנו . בפי . אמתחותינו . השיבונו . אליכה . מארץ . כנען . ואיך . ניגנוב . מיבית . אדוניכה . כסף . או . זהב | 8 |
| אשר . ימצא . איתו . מעבדיכה . ומת . וגם . אנחנו . ניהיה . לאדוני . לעבדים | 9 |
| ויואמר . גם . עתה . כדיבריכם . כן . הוא . אשר . ימצא . איתו . יהיה . לי . עבד . ואתם . תיהיו . נקים | 10 |
| וימהרו . ויורידו . איש . את . אמתחתו . ארצה . ויפתחו . איש . אמתחתו | 11 |
| ויחפס . בגדול . החל . ובקטון . כילה . וימצא . הגביע . באמתחת . בינימין | 12 |
| ויקרעו . סימלותם . ויעמוס . איש . על . חמורו . וישובו . העירה | 13 |
| ויבוא . יהודה . ואחיו . ביתה . יוסף . והוא . עודנו . שם . ויפלו . לפניו . ארצה | 14 |
| ויואמר . להם . יוסף . מה . המעסה . הזה . אשר . עסיתם . הלוא . ידעתם . כי . נחש . ינחש . איש . אשר . כמוני | 15 |
| ויואמר . יהודה . מה . נואמר . לאדוני . מה . נדבר . ומה . ניצטדק . האלוהים . מצא . את . עוֹן . עבדיכה . היננו . עבדים . לאדוני . גם . אנחנו . גם . אשר . נימצא . הגביע . בידו | 16 |
| ויואמר . חלילה . לי . מעסות . זואת . האיש . אשר . נימצא . הגביע . בידו . הוא . יהיה . לי . עבד . ואתם . עלו . לשלום . אל . אביכם | 17 |
| ויגש . אליו . יהודה . ויואמר . בי . אדוני . ידבר . נא . עבדכה . דבר . באזני . אדוני . ואל . יחר . אפכה . בעבדכה . כי . כמוכה . כפרעוה | 18 |
| אדוני . שאל . את . עבדיו . לאמור . היש . לכם . אב . או . אח | 19 |
| ונואמר . אל . אדוני . יש . לנו . אב . זקן . וילד . זקונים . קטן . ואחיו . מת . ויותר . הוא . לבדו . לאימו . ואביו . אהבו | 20 |
| ותואמר . אל . עבדיכה . הורידוהו . אלי . ואסימה . עיני . עליו | 21 |
| ונואמר . אל . אדוני . לוא . יוכל . הנער . לעזוב . את . אביו . ועזב . את . אביו . ומת | 22 |
| ותואמר . אל . עבדיכה . אים . לוא . ירד . אחיכם . הקטון . איתכם . לוא . תוסיפון . ליראות . פני | 23 |
| ויהי . כי . עלינו . אל . עבדכה . אבי . ונגד . לו . את . דיברי . אדוני | 24 |
| ויואמר . אבינו . שובו . שיברו . לנו . מעט . אוכל | 25 |
| ונואמר . לוא . נוכל . לרדת . אים . יש . אחינו . הקטון . איתנו . וירדנו . כי . לוא . נוכל . ליראות . פני . האיש . ואחינו . הקטון . איננו . איתנו | 26 |
| ויואמר . עבדכה . אבי . אלינו . אתם . ידעתם . כי . שניים . ילדה . לי . אישתי | 27 |
| ויצא . האחד . מאיתי . ואומר . אך . טרוף . טורף . ולוא . ראיתיו . עד . הנה | 28 |
| ולקחתם . גם . את . זה . מעים . פני . וקרהו . אסון . והורדתם . את . סיבתי . ברעה . שאולה | 29 |
| ועתה . כבואי . אל . עבדכה . אבי . והנער . איננו . איתנו . ונפשו . קשורה . בנפשו | 30 |
| והיה . כיראותו . כי . אין . הנער . ומת . והורידו . עבדיכה . את . סיבת . עבדכה . אבינו . ביגון . שאולה | 31 |
| כי . עבדכה . ערב . את . הנער . מעים . אבי . לאמור . אים . לוא . אביאנו . אליכה . וחטאתי . לאבי . כל . הימים | 32 |
| ועתה . ישב . נא . עבדכה . תחת . הנער . עבד . לאדוני . והנער . יעל . עים . אחיו | 33 |
| כי . איך . אעלה . אל . אבי . והנער . איננו . איתי . פן . אראה . ברע . אשר . ימצא . את . אבי | 34 |
